خیبر پختونخوا حکومت نے لینڈ ریکارڈ اصلاحات کے سلسلے میں اہم پیش رفت 

خیبر پختونخوا حکومت نے لینڈ ریکارڈ اصلاحات کے سلسلے میں اہم پیش رفت کرتے ہوئے لینڈ ریکارڈز کے حصول کو آسان اور محفوظ بنانے کے لیے الیکٹرانک جائیداد کارڈ کے اجرا کا فیصلہ کیا ہے، کارڈ میں درج تفصیلات کی تصدیق کے لیے موبائل ایپ کی سہولت فراہم ہوگی۔وزیر اعلیٰ خیبر پختونخوا علی امین خان گنڈاپور کی زیر صدارت بورڈ آف ریونیو کے اجلاس میں جائیداد کارڈ کو ابتدائی طور پر صوبے کے ضم شدہ اضلاع میں جاری کرنے کا فیصلہ کیا ہے، اجلاس کو بریفنگ میں بتایا گیا کہ جائیداد کارڈ ای پاس بک کے طور پر کام کرے گا۔بورڈ آف ریونیو کے حکام نے بریفنگ دیتے ہوئے بتایا کہ شہری جائیداد کارڈ میں موجود کیو آر کوڈ اسمارٹ فون کے ذریعے اسکین کرکے اپنے تمام لینڈ ریکارڈ تک باآسانی رسائی حاصل کر سکتے ہیں، اس مقصد کے لیے انہیں سروس ڈیلیوری سینٹر، پٹوار خانے یا کسی بھی دفتر کا چکر نہیں لگانا پڑے گا۔وزیر اعلیٰ علی امین گنڈاپور کا کہنا تھا کہ الیکٹرونک جائیداد کارڈ کا اجرا ریونیو اصلاحات کے سلسلے میں صوبائی حکومت کا اہم قدم ہے، صوبائی حکومت لینڈ ریکارڈ اصلاحات کے لئے انفارمیشن اینڈ کمیونیکیشن ٹیکنالوجی کا موثر استعمال عمل میں لا رہی ہے۔